برتھ ‏ڈے

برتھ ڈے۔۔۔کیک 

کیا یہ جہالت نہیں چند ایک کو چھوڑ کر اکثر برتھ ڈے پر جس انسان کی برتھ ڈے ہوتی ہے کیک کو اسی کے چہرے پے مل دیا جاتا ہے۔۔۔ 

پانی روٹی کی طرح کیک بھی تو نعمت ہے اور پھر کیک تو روٹی پانی کی نسبت کافی محنت سے بنتا اور خاصہ مہنگا خریدا جاتا ہے۔۔۔اور پھر کیک تو ویسے بھی،کریم، چاکلیٹ اور فروٹس سے تیار ہوتا ہے جو اتنی اعلی اور مہنگی اشیا سے تیار ہو پھر اس نعمت کی اتنی ہی زیادہ بے قدری اور ناشکری کیونکر ہو؟ 

کیا برٹھ ڈے پارٹیز پے اس غلط رسم و رواج اور بیہودہ پن کو ختم نہیں ہونا چاہیے۔۔یا آپ اگر برتھ ڈے مناتے ہیں تو کیا آپ چاہیں گے کہ آپ کی برتھ ڈے پے رزق کو پیروں تلے روندھا جائے۔۔اسے چہرے اور کپڑوں پے مل کر رزق کی بے قدری اور ناشکری کی جائے۔۔اگر آپ اس کے خلاف ہیں تو آپ عہد کریں کہ آپ اپنی برتھ ڈے پے اپنے تمام عزیز و اقارب کو پہلے سے منع کر دیں کہ میری برتھ ڈے پے جس نے یہ حرکت کرنی ہے وہ نہ آئے۔۔۔اور اپنے دوست احباب اور عزیز و اقارب کو بھی باور کروا دیں کہ جو اپنی برتھ ڈے پے کیک کو چہرے پے یا کپڑوں پے مل کر ضائع کرے گا میں اس کی برتھ ڈے میں شامل نہیں ہونگا۔۔آپ کو اپنی اچھی اور منفرد سوچ سے اپنا معیار اور عزت و وقار بنانا ہے۔۔ایسی سوچ جو نئی، منفرد اور دوسروں کی روایتی سوچ و فکر سے ہٹ کر ہو جس سے معاشرے میں ایک اچھی ریت و رسم قائم ہو اور جس کے کرتا دھرتا آپ ہوں۔۔کل کلاں کو جب کوئی کسی اچھی بات، کسی مثال یا کسی ریت و رسم کی مثال دے تو وہ آپ کا نام لے۔ 

جو جو میری اس بات سے اتفاق کرتے ہیں وہ چاہیں تو اس تحریر کو اپنے دوست و احباب اور عزیز و اقارب کے ساتھ شیئر کریں اور اس بیہودگی کو روکنے میں اپنا کردار ادا کریں۔ 

ہاں میں مفت کا مشورہ ضرور دینا چاہوں گا گر جو کوئی عمل کرنا چاہے تو۔۔۔آپ اپنی آنے والی برتھ ڈے کو کسی قریبی جونپڑیوں میں رہنے والے، پکھی واس، خانہ بدوش یا در بدر سڑکوں اور اشاروں پے مانگنے والے فقیروں کے ساتھ برتھ ڈے منائیں جنہیں ہر دن پانی اور روٹی کے لالے پڑے ہوتے ہیں اگر ان کو اپنی برتھ ڈے کی خوشیوں میں شامل کر لیا جائے اور ممکن ہو تو ان میں اپنی حیثیت کے مطابق چند روپے یا چند دنوں کا راشن ڈلوا دیا جائے تو یقیناً عید سے پہلے ان کی عید ہو جائے گی۔۔بھلے چھوٹی عید ہی سہی مگر ان کے لیے یہ عید جیسا سما ہی ہو گا کیونکہ انہیں ایسی عیاشی شاز و نادر ہی میسر ہوتی ہو۔۔اور اگر اس سے بھی اعلی و اولیٰ کام کرنا ہے تو پھر اپنے کسی نادر، مستحق سفید پوش رشتے دار کے ہاں جا کر ان کے ساتھ اپنی برتھ ڈے منائیں اور اسی دوران چپکے سے انکی مالی یا کھانے پینے کی اشیا سے مدد کر دیں اور اگر ایسے رشتے دار بھی نہ ہوں تو اپنے محلے میں، اپنے آفس میں، اپنے ارد گرد کے کسی بھی مستحق و نادار، سفید پوش اور خود دار انسان یا خاندان کے ساتھ برتھ ڈے منائیں اور ان کی مالی یا راشن سے مدد کریں۔۔یقین کریں آپ کی ایسی برتھ ڈے زندگی کی سب سے حسین ترین اور بہترین یادگار برتھ ڈے بن جائے گی اور ایسی برتھ ڈے بھلا کیونکر یاد گار نہیں بنے گی جس میں نیکی اور انسانیت ہو۔۔مشورہ میرا تھا اب مشورے پے عمل کرنا نہ کرنا آپ پر منحصر ہے۔ 

اور آپ ایسی یادگار برتھ ڈے کو تصاویر اور ویڈیوز میں محفوظ کر لیں تاکہ آپ انہیں پھیلا کر دیگر لوگوں کو بھی اس کار خیر میں شامل ہونے کا خاموش پیغام دے سکے۔۔پر ایک بات یاد رہے کہ اس سب میں ایسے لوگوں کی دل آزاری نہ ہو، انکی عزت نفس کو ٹھیس نہ پہنچنے پائے اور جس میں ریاکاری نہ ہو۔۔فقط خالص و خالصتاً ربّ رحمٰن کے بندوں کے چہروں پے مسکراہٹیں بکھیرنا نیت ہو اور اس کے پیچھے ربّ رحمٰن کی رضا و خوشنودی پانا مقصود ہو۔ 

"اصل خوشیاں تو ہوتی ہی وہیں ہیں جو بانٹنے سے اداس، افسردہ اور غمگین چہروں پے بھی مسکراہٹیں بکھیر جائیں اور ان ہنستے کھلکھلاتے اور مسکراتے چہروں کو دیکھ کر آپ کی خوشیاں دوبالا ہو جائیں، آپ اندر سے خوشی کو محسوس کرنے لگیں اور ایسی خوشی جو آپ کی روح تک کو سرشار کر جائے"۔ 

نوٹ: برتھ ڈے منانا جائز ہے یا ناجائز، حلال ہے یا حرام، فضول خرچی ہے، کیک کے پیسے کسی غریب کو دے دو وغیرہ وغیرہ جیسی بحث سے گریز کریں۔۔جو جو برتھ ڈے مناتے ہیں یہ تحریر فقط انہی کے لیے ہے کہ وہ اس خرافات کو ختم کریں اور رزق کی بے ادبی و توہین کو بند کریں اور معاشرے میں ایک اچھی و منفرد مثال قائم کریں۔ 

#insaanorinsaaniyat 

تحریر- وقاص